( طب و بعدين... (بلفتات بسيطه نغير محيطنا

انتهى شهر في السودان ... و لكن طب و بعدين:

2005-10-31T21:59:00.000-08:00

عدت منذ اربعه اسابيع تقريبا و لكن لكي اكون صادقا معكم لم يكن لدي رغبه في ان اجلس امام الشاشات و المفاتيح، رغبت ان اكون بعيدا عن القصص و الكلام. نعم، خفت على ثمره ما عشته من ان يتحول الي مجرد حواديت، اعتزلت الكتابه و جانبت الناس لفتره من الوقت حتى اختمر ما عشته من خبرات. و لكن بصراحه على الرغم من

كل ما سجلته من خبرات فأنا متردد في نشرها ... هل سيقرأها احد؟ هل سيفهم احد ما بعد الصوره والسطور ؟

يا رب، إن العالم ليس جميلا
ذلك العالم الذي أٌعطينا أن نصنعه.

الناس جائعون – الي الخبز نعم-
و لكن الي الى الحنان و التقدير و الحب ايضا.
الناسُ يموتون لأنه ليس لديهم أسباب للحياه.

لا ينتظرون منا الذهب و الفضه.
بل يريدون أن نقول لهم من هم
و من أين أتوا و لماذا يعيشون و إلى أين يذهبون.

يريدون أن يسمعوا من أن حياتهم مفيده
و أن كل حياه جديره بأن تعاش.

يا رب اريد أن اقول لكل انسان
للمقعد للمذل و للأعؤج و للمجروح: قم.
يا رب اريد أن اعيد القوه للأيادي التعبه.
اريد ان أسأل القلوب المضطربه أن تستعيد ثباتها.
اريد ان اعمل لكي يُرى حنان الله على ارض الناس.
اريد ان ....
اريد ان افعل هذا بأسمك.

يا رب انا اعلم ان في امكاني ان اعمل اعمال عظيمه
بقليل من المخيله، بقليل من الجرأه.

و لكني أخاف، أخاف أن أجاهد
أخاف أن أبذل نفسي
خاف أن أخسر حياتي.

من كتاب صلوات جديده بتصرف

.... اشوفكوا بعد شهر

2005-08-31T04:28:00.000-07:00

مدونه في الترانزيت .. وصلت و مسافر تاني :

2005-08-22T00:40:00.000-07:00

مدونه في الترانزيت .. وصلت و مسافر تاني :

ايه ده اغيبلي كام اسبوع الاقي كل ده حصل، ما كنتش عارف اني بتابع كل المدونات ديه بقالي تلات ايام بحاول اشوف الي فاتني عايزين حد يعملنا ملخص الله يخليكوا .
اعتزاري للانتحاريين الي بيزوروا طب و بعدين انا لسه جاي من السفر طازه بس مسافر تاني بعد كام يوم و مشغول قوي لسه بعد 11 شهر تحضير فيه حاجات تتعمل علشان سفريه عمري تنجح . و بصراحه ما بشوفش البتاع الى اسمه كمبيوتر غير صدف . بعد صيف مليان سفريات و حاجات مجنونه. استنوا حكاوي مستعمره الجزام (مجتمع خايفين منه رافضينه )
العزايزه ( قريه هناك في اسيوط ) الصيف كان كبير و فيه سفريات تانيه كتير. استنوا التفاصيل.

؟ : احنا مين

2005-07-14T11:55:00.000-07:00

بعد فتره انقطاع عن متابعه المدونات عُدت لاكتشف حمله مش كده الشرسه و كالعاده السؤال كان طب و بعدين .. فكرت في كده الي بنقول ان مصر عليها و شويه شويه فكرت في مليون اتجاه، شخصت السؤال و فكرت مين الانسان ؟ و وصلت للسؤال الجدلي بتاع الهويه. و بصراحه ما موصلتش لحاجه. -انا مش بعرف اجاوب على ليه:)

قررت ارجع لكوكبي الي بعرف اعيش عليه. طلعت من وسط زحمه الكمبيوتر صوره صورتها من كام يوم، الصوره لعماره بعدي عليها شبه يوميا من اول ما اتعلمت افكر، الصوره مش محتاجه تعليق العماره اتهدت و بيتبني بدلها عماره جديده ملهاش اي علاقه بطابع المنطقه المميز (لاحظوا العماره الي جنبها).

احكيلكوا حدوته: كنت في مدرستي و لاحظت واحد ملامحه صعيديه ماسك قاموس فرنسي بيحاول يتكلم مع واحده بالفرنسي، اتطوعت اترجم (16 سنه بدرس فرنسي اكيد ليهم فايده) ابطال الحدوته برناديت فنانه زجاج معشق بليجيكيه و شفيق تلميذها من البياضيه، اسيوط. و بعد نجاح المهمه قالتلي برناديت انها بقالها 5 سنين من اول ما ابتدت تيجي علشان تعلم اولاد البياضيه الزجاج المعشق و هي بتحاول تفهم شفيق انه فنان كويس بس مشكلته ان الي بينقله من الكتب ملوش معنى لانهم في كل مكان في العالم بينقلوا من نفس الكتاب و يمكن بينفذوه احسن منه، الي بيعملوا ملوش معنى لانه متكرر. هي عايزاه يعمل للي بيشوفه للنيل و البيوت، سألتني ان كنت رحت البياضيه قبل كده و لما قلتلها اني رحتها كتير طلعتلي من البوم الصور الي معاها صوره لزجاج معشق نفذته في كنيسه في بلجيكا و اول ما شوفته كان و اضح قوي منارات الكنائس و النيل و فرن ام مجدي و الاولاد الصغيرين و هم بيلعبوا وسط البوص.

كل الي عايز اقوله اننا محتاجين مننساش احنا مين، ماننساش اصولنا و جزورنا و نستورد كل حاجه من بره و مش كل حاجه تناسبنا. مش قصدي بس على مستوى البلد و لكن برضو على المستوى الشخصي، بتغاظ جدا من الناس الي بيعمموا رايهم الشخصي و يخلوه المعيار القياسي للكون و بتغظ اكتر من الناس الي بيمشوا وراهم و يقولوا امين على رأي الي حواليهم في كل حاجه. يعني ايه الي يخلى الجميله شعرها اصفر؟ و ايه الي يخلي الي بيشرب سجاير راجل؟ و ايه الي يخلى عمر خيرت احسن مؤلف ؟ بصراحه و من غير زعل الراجل مبيلمسنيش... و ايه الي يخلي مصر احسن بلد في العالم؟. انا عندي مشكله كمان هي اننا بنستخدم صيغه التفضيل (احسن و اجمل و اعظم .. ) في رأيينا دايما ، يعني لما بنعلم اولادنا و هم صغيرين ان مصر احسن بلد يبقى ملوش معني التعب ما احنا و صلنا خلاص للمطلق.. ديه حاجه محتاج كلام كتير يعني تدوينه لوحدها .. استنوها.

: ابتسامه في السواد

2005-07-10T02:56:00.000-07:00

و دنياي – بعد فنائي – تبقى
لينعم هذا ... و ذلك يشقى
و هل يشعر الموج – موج الخضم
بتلك الحصاه التي فيه تلقى؟

رباعيات عمر الخيام ترجمه ابراهيم العريض

قفزت في ذهني هذه الرباعيه للخيام و انا اشارك صديق فقدانه عزيز. لم اعرف الفقيد يوما و لكني لم استطع ان اقبل انه لم يترك اثراً. كان العذاء في ذات يوم اعدام القائم باعمال السفاره المصريه بالعراق و مقتل العشرات في لندن. و بينما كان الجميع يتسألون عن الاسباب كنت كعادتي افكر في الخطوه التاليه. تخيلت تعليقات المدونون و تحليلاتهم السياسيه لمقتل الدبلوماسي المصري و الابرياء البيرطانيون. فكرت في "الموت: طب و بعدين " .... لكني تنبهت و انا في العذاء على ابتسامه يحملها وجه دافىء بشوش نجح ان ينتزع الحضور من صورتهم التقليديه. لم اتخيل ان تلك الابتسامه الدافئه قادره على خلق كل هذا التغيير في الجمع المتشح بالسواد. تابعت صاحب الابتسامه، لم ينطق حرفاً و لكن ابتسامته السخيه ارغمت الجميع ان يبادلوه الابتسامه، ان يتحرروا من تساؤلات الفراق و يفكروا في " طب و بعدين " لم اجد قيمه للكلام، فالابتسامه قالت كل شيء. سَخرت من الخيام دون ان تجادله، قالت له الكثير في صمت

...

للتفكير

2005-07-08T12:26:00.000-07:00

الصوره من قريه كوم ابو حجر في اسيوط صورتها من سنه تقريبا لما بشوفها بفكر في حاجات كتير ... انت بتفكر في ايه؟

الشكر كل الشكر لفروجي استضافت الصوره حتي نجحت في نشرها .

... : دردشه: المصريين شعب حدوته ميعرفش "معرفش"

2005-06-25T11:49:00.000-07:00

الحدوته: كنت بتكلم مع مجموعه عن الي شفناه بره مصر و اتحول الحديث عن الي بنشوفه في مصر و المصريين. بصراحه افتكرت مليون حاجه عشتها في الشوارع يعني انا اصلا طول عمري بحب ادردش مع الناس في الشارع. ناس متعرفهمش بس تحس ان كل الناس حابه تشاركك حياتهم و تساعدك في مشكلتك يعني لو بصيت يمين و شمال هتلاقي حد بيميل عليك ويقولك بتدور على حاجه يا استاذ ؟ و لو طلعت كاميرا هتلاقي مليون واحد بيسألك ( و طبعا ممكن يكون عسكري .. و فروجي قال ايه متضايقه انهم بيفتكروها سائحه) بحب دردشه مفتش التذاكر في المترو و هو بيحكيلي عن البرنيطه الي لازم يلبسها لحسن يخصموا من مرتبه يوم -مع انه الوجيد الي بشوفه لابسها يمكن تكونوا شفتوه في محطه مبارك- ، المصريين بيحبوا الحواديت و بيرحبوا بالكلام مع الغريب يعني مثلا امبارح كنت في المترو كنت رايح محطه القطر و كلن فيه محمد كان بيبص على الساعه كتير كل الي قلتوا ان المترو جاي في الطريق و بعد عشر دقايق كنت معاه في محطه القطر بساعده في شيل الشنط بعد ما عرفت انه خلص امتحانات تجاره الازهر و انه راجع قريته في اسيوط . انابحب الحكايه ديه في المصريين واحد متعرفوش قاعد في الاتوبيس يمد ايد ياخد الشنطه الي انت محتاس بيها و يشيلهالك على رجله. تحس ان الكل اهلك و اصحابك و مش بس في الصعيد يا زياد الناس بيقولوا سعيده و اتفضل شاي بس انت الي بتركب عربيتك و مش بتشوف المصريين قبل تأثير التلوث ;)
المشكله بقى ان مفيش حد هيقولك معرفش واحده من المجموعه مقتعه ان الفتي ظاهره مصريه جدا و ان اي مصري تسأله عن اي حاجه مستحيل يقول انه ميعرفش، لازم يفتي. كنت شايف ان كلامها متطرف زياده عن الزوم قالت انها هتقنعني .. كنا ماشين في الشارع وقفت واحد شكله محترم .. لو سمحت شارع الشهيد ميكي موس منين؟ تخيلوا التعبيرات الجاده .. احم احم الراجل بص يمين و شمال بيدور يقول ايه، كانت عايزه تقنعني.. كملت قالتله الي فيه فيلا كذا هانم الدراملي و قالت اسمها .. طبعا انا بعد صدمه وسيله الاقناع الغريبه كنت بحاول امسك نفسي من الضحك بالعافيه ( للي ميعرفنيش انا ضحكتي زي ضحكه جني المصباح على رأي اصحابي و كان هيتعملي محضر شغب في الامتحان مره بسببها .. طبعا بعد ما شوفت ورقه الاسئله) المهم الراجل قعد ربع ساعه يحكي عن الفيلات الموجوده في المنطقه و اقتناعه التام بان شارع الشهيد ميكي يمين في شمال لأن ده الشارع الي فيه الفيلال. اتمنى ان محدش يجرب السؤال لاسباب لمليون سسبب متخيل انكم عارفينها . ده غير اني اكتشفت ان الكل عارف سؤال فين سفاره مصر في الزمالك؟ و الناس بتجاوب اي حي الس}ال بيمسى و الناس تجاوب ...(لسكان كوكب زحل مصر اكيد ما فيهاش سفاره

لمصر ... ان قولت اطمن بس )

طب و بعدين : فيه كلمه ممكن نستخدمها في حوارنا العادي اسمها معرفش و مش اهانه يا جماعه انك تكون متعرفش . او ممكن تقترح حد ممكن يساعد فعلا يعني مثلا ...مكن حضرتك تسألأ صاحب الكشك هيعرف اكتر . رأينا الشخصي يبتدي بكلمه افتكر، اعتقد ، متخيل ....

:اليوم فقدت ايماني بك

2005-06-13T08:37:00.000-07:00

...عندك حق يا صاحبي انا غلطان بس مش بس علشان اسلوبي ركيك
واحد بس بيفمني مش اتنين . المره الجايه هكتب بلغه متفهماش او يمكن يموت الكلام قبل ما يتولد و ترتاح . يا خساره يا صاحبي كنت فاكر ان طريقنا واحد بس اكتشفت اني كنت شايف فيك الوهم الي كنت دايما بدور عليه في الناس مش الحقيقه . اليوم فقدت ايماني بك.

:انين صاحب اللفتات

2005-06-13T02:10:00.000-07:00

.قلب صمت و لم اتقدم و روح ستفارقنا و لم اتقدم، لم يتقدم صاحب اللفتات

.. ظللوا يرددوا من حولي جمل طالما رفضتها
..يرددون
..يمنطقون
.. يبررون.
..يصرخون

..احدا لم يفهمني، قلب صمت بعض ان نضب منه الدماء و لم امد شرياني
..انسان يفقد الحياه و انا استمتع بها

. يا صاحب اللفتات انت تنافق ذاتك -
... لا لقد حاولت و لكنهم منعوني-
الم يمنعوك من اللهو و حاربت الم يمنعوك من المتعه و هربت؟-
...اني -

.. انت مازلت عبدا، كنت مقتنع انك متمرد، مجنون متحرر-
لماذا تجلدني انا انسان .. لقد حاولت، جادلت، تمردت و لكنهم نجحوا حين زرعوا في الخوف .. اخاف وانا الذي طالما مددت شرياني! نعم كان خوفي سيكون مفهوما ان كانت التجربه جديده و ان لم اكن اقنع الجميع بها و لكني خفت .. نعم خفت و لكني تعلمت.
مره اخرى حاولت ، جادلت ، تمردت و لكنهم نجحوا ايضا مره اخرى حين قيدوني بقوه الحب ... اي حب هذا الاناني!

-
لماذا صمت اين اختفيت ؟-
-
.. تكلم معي كرر لي منطقهم قل لي اني فعلت ما بوسعي -

لم تتغير الحقيقه: قلب صمت و لم اتقدم و روح ستفارقنا و لم اتقدم، لم يتقدم صاحب اللفتات
.أسمعوني.. اصبحت رافض لكل شيء، حراً من قوانينكم، متمردا على منطقكم

على كوكب العقلاء تروني مجنونا يا ليتني كنت كذلك . ساظل ابحث عن عيون ليست خاويه كعيونكم وعن جمل ليست بلهاء كجملكم. لم اتحرر بعد لكن شكرا فلقد عرفت طريق الحريه و ليست هذه هي الحقيقه الوحيده فمتمرد اخر سيظهر و القلب الصامت سيغني فأنا كلي ايمان . و سأظل ادعو الله ان يرسل الينا مجانين .. 1

أللهم ، أرسِل إلينا مجانين
يلتزمون عميق الالتزام،

يَنسَون ،
يحبون بالفعل لا بالكلام ،
يبذلون ذواتهم حقًا و حتى النهايه .

نحن بحاجه إلى مجانين ،
أناس غير منطقيين ،
متهوسين ،
قادرين على القفز في عدم الاستقرار ،
في مجهولٍ أوسع دومًا من الفقر و العوز.

نحن بحاجه إلى مجانين شُغفوا بالحاضر ،
مُغرَمين بالحياه البسيطه ،
يحبون السلام ،
طاهري الذيل لا يساومون ،
عَقدوا النيه على أن لا يخونوا ،
يهزأون بحياتهم ،
قادرين على أن يقبلوا أي مهمه
و يذهبوا إلي كل مكان ،
أحراراً و في الوقت عينه طائعين ،
عفويين و في الوقت نفسه عنيدين ،
وُدعاء أقوياء.
اللهم أرسِل إلينا مجانين.

يا كل من يسمع صرختي الا تعلم انه لا يجوز استرقاق احد أو استعباده و ان الرق و الاتجار بالرقيق يحظر بجميع صوره. (2) لماذا ترضى بالعبوديه؟ لماذا تبحث عن القيود ؟ لماذا تعمم القيود؟ لماذا تفرضها على كل من يقترب منك ؟

يا كل من يسمع صرختي الا تعلم ان لكل الفرد الحق في الحياه و الحريه و الامان على شخصه . (3) لماذا تتخلى عن حياتك عن حريتك عن امانك؟ لماذا تسلب الحياه و الحريه و الامان من قلوب كل من يقترب منك ؟

يا كل من يسمع صرختي الا تعلم ان لكل فرد واجبات ازاء الجماعه، التي فيه و حدها يمكن أن تنمو شخصيته النمو الحر الكامل (4) لماذا لا تقوم بواجبك؟ لماذا لا تريد ان يتقدم احد للقيام بواجبه؟ الا تعلم انك محتاجا اليه؟

يا من يريد التحرر اعلم ان اغلب الناس يهابون الحريه لانها تتطلب المسؤليه 5

........................................................................................
(0) من وحي تجربه شخصيه. ماتت انسانه لا اعرفها لان حين اتصلت بي صديقتها لاتيرع بدمي لم اجيب طلبها و الان انسان اخر يصارع و حين اتصل بي قريبه لم اجيب طلبه . يا من تحررت اتصل بي فقد تستطيع ان تنقذ انسانا .
(1) عن كتاب صلوات غير عاديه .
(2) الماده 4 من الاعلان العالمي لحقوق الانسان .
(3) الماده 3 من الاعلان العالمي لحقوق الانسان .
(4) الماده 29 من الاعلان العالمي لحقوق الانسان .
(5) الجمله لبرنارد شو بتصرف.

:هامش لابد منه

2005-06-10T03:34:00.000-07:00

احترامي لأصحاب الاسلوب الرفيع غير المتكلف
للمتمردين الذين يفهمون و يُـفهمون
وللعقلاء البسطاء.

كان لازم اقول انا ليه بكتب بالاسلوب ده... الموضوع مش بس قدرات ادبيه محدوده ، الحكايه اني شايف ان مينفعش نستخدم لغه اجنبيه و نخلعها من الثقافه بتاعتها .. يعني مثلا في مصر لما تيجي تشتري قماش تقول انا عايز متر و ربع ، لو قلت في فرنسا كده محدش هيفهم ان كان قصدك 125 سم. انا ما روحتش فرنسا بص التجربه حقيقيه لواحد صاحبي.
علشان كده و انا بترجم مشاعري و خبرتي الي عشتها في مصر حاجه غير منطقيه اني اتكلم بالفرنسي او بالانجليزي .
يفضل السؤال القوي ليه بالعاميه؟ الحكايه اني حابب اكتب زي ما بتكلم و اسيب الوضوع دردشه.. لما كتبت الدردشه" بالعربي" و قريت الي كتبته جالي هيستريا ضحك لما شفت اني كتبت حاجه تانيه خالص ده طبعا بعد ما صلحت النحو الفظيع و رسم الهمزه و المصطلحات المتقعره الي بتنط فجأه في الكلام. فيه حاجات كمان مينفعش تتقال بالعاميه

و الاسهل تتقال بالعربي افتكر الوضوع و التجربه بتفرض الاسلوب (و فيه موهوبين يقدروا على اي حاجه)، طبعا انا مش رافض اي لغه كوسيله اتصال بس مقتنع ان الاتصال نجاحه غير كامل من غير احترام ان اللغه مُكون في ثقافه الشعب.
علشان كده انا بدردش بالمصري يا مصريين

.
ملحوظه: لم أستغل اني المدون في الخروج عن هدف المدونه .. الأذكياء فقط سيفهمون اللفته التي اشير اليها و الاسقاط مسؤليتك.

: ومضات

2005-05-29T10:03:00.000-07:00

أنا أعلم:
أنه إن كان الناس الاف يموتون جوعاً
في حين أن اخرين، في اللحظه نفسها، يموتون تخمه
فذلك لأاننا لم نعرف كيف نتقاسم القمح
و لا كيف نعجن الدقيق لأخوتنا البشر.

أنا أعلم:
أنه ان كان من الناس من لا يرون على صفحات كتبهم
الا العلامات السوداء و الخرساء
فذلك لأن بعضهم يحتفظون بالمعرفه لأنفسهم
كموهبهه خاصه بهم.

أنا أعلم:
أنه ان كان من الناس من هم
أذكياء و معافون، و شجعان أكثر من غيرهم
فكل ما يتمتعون به هو دين، هم مدينون به للمحرومين
ولكني أعلم أيضاَ أن هذا الدين غالباً ما يزداد
من دون أن يوفى.

أنا أعلم:
أنه ان كان الملايين من الناس يحيون
من دون أن يستطيعوا أن يقوموا بدورهم في بنيان العالم
وذلك بحريه و مسؤليه
فذلك لأن بعضهم يظنون أنهم ولدوا ليكونوا أسياداً
و لابد لهم من عبيد لكي يبقوا في مقامهم

أنا أعلم:
أنه ان كان الالاف من الأسرى
ينازعون في المعسكرات
أو يصيحون تحت وطأه التعذيب
فذلك لأن بعض الناس نصبوا أنفسهم ملاكاً للحقيقه،
و هم يقتلون الأجساد رويداً لكي يوت التفكير.

أنا أعلم أيضاً و هذا مصدر أعجاب لي
أن بعض الناس، في كل مكان، ينتصبون بشجاعه
و يلقون بانفسهم في الصراع
من أجل العداله و السلام

من كتاب حدثني عن الحب لميشيل كواست

امتحانات ولا امتناع لا اضراب و مش ايديولوجيه :

2005-05-17T01:53:00.000-07:00

الحدوته: امتحاناتي يوم 22/6 و زى كل الناس الي في الجامعات المصريه الامتحانات النظريه تخلينا نعد في البيت، ننقطع عن العالم و نشوف الراجل الي حاطط الامتحان عايزنا نقوله ايه...
لو كلو مشي تمام المفروض اخلص يوم 12

طب و بعدين : قررت اسمع الكلام (شكرا فروجي) و افتحلي كتاب و متوقع اني مكتبش حاجه جديده بس قبل يوم الاستفتاء على الدستور مش قادر امسك نفسي و اعمل نفسي فاهم حاجه
يا ريت حد -الله يخليكوا- يبقولي نص الماده 76 و الماده 192 مكرر دول بيقولوا ايه . كل الناس موافقه بس علي ايه؟

ان الدستور يتعدل و خلاص؟ و لا على الماده 76 و الماده 192 مكرر؟ افتكر الاستفتاء على كدة .
ملحوظه: مش بقترح اطروحه دستوريه بس عايز افهم هما عايزنا نقولهم ايه :) ...

السلام عليكم، صباح الخير، صباح الفل، اي صباح ... :

2005-05-15T09:02:00.000-07:00

الحدوته:

تخيل نفسك بتبيع تذاكر في محطه المترو ولا موظف امن علي مؤسسه بتستقبل كذا الف واحد في اليوم ولا ليه تتخيل شوف انت في شغلك في كليتك بتشوف كام واحد؟ وشوش كتير تعدي قدامك بس انت مشغول و حياتك زحمه و بتفكر في مليون حاجه من ساعه لما صحيت . و فجأه: واحد يقف و يبصلك و يبتسم و يقولك صباح الخير

طب وبعدين : الحكايه اننا بننسى اننا نتعامل مع انسان مع بني ادم ، مش بس كده في ناس مش بنقولوهم صباح الخير علشان مش مقتنع انه موجود اصلا . انا فاكر لما كنت في اعدادي و اتفقنا في فريق اغصان الكرمه ( نشاط تعلمت فيه مبادىء الطيران ارتضى اعضائه الحاليين بنير الجاذبيه) نجرب نقول صباح الخير... و حصل اكتشاف: موظف المترو لما بيشوفني لحد دلوقت رد فعله بيفرحني ازيك عامل ايه ؟ كلام ممكن يكون بيتقال و خلاص بس بيفرق مع الابتسامه. الراجل اللي فارش جنب المدرسه ما بيعملش حاجه غير انه يزرع و يأكل القطط يسمع كلمه صباح الخير يقوم من الأرض و يدعيليك... انت ليه مش بتقول صباح الخير؟ غريبه، الغلس بقي الناس الي تسألك الساعه كام ؟ من غير و لا صباح الخير و لا لو سمحت ولا شكرا و لا حتى بيقف اصلاً.... الحكايه اننا نبطل نهتم مين اللي بتقولوا صباح الخير و فكر في قيمه الكلمه. رأيت لناس يرفضوا ان يقولوا صباح الخير لبعض الناس لاسباب عديده: شخصيه، عقائديه .... مثلا صديقي ا. حكي لي ان البقال لم يجيب السلام عيكم لانه لاحظ ان شعره طويل !! (ملحوظه ا. شعره مش ضفيره بس الراجل بيحلق مره كل اربع خمس شهور بخل يمكن...) ولا تعليق ..

ايه الحدوته :

2005-05-15T08:48:00.000-07:00

الحدوته:

اكتشاف : كل ما تعلو عن الأرض تشوف ابعد . علشان كده نلاقي ناس تنط، تطلع علي سلمه، تتشعبط على شجره و لا على عمود نور و ناس كمان تطير. خلاص يبقي لو عايز تشوف بعيد لازم تطير و تتحدي كل التفاحات الي بتقع علي راس نيوتن، بس كمان متبقاش زي القمر من كتر ما هو عالي بقي صعب يبص و يشوف و يحس بالي بيحصل. الطيران مش سهل للي مربوطين بالارض.. خلاص الحل منطقي نتحرر من الارض من قوانينه و نكون مجانين.

حد فهم حاجه؟؟؟
العيب مش فيكم بس هي مسأله تعود ربنا يديكوا الصحه و طوله البال.

الحدوته انى شايف ان في ناس كتير جدا ممكن يعملوا حاجات كبيره و يغيروا شكل العالم بس الحكايه انهم معندهمش الشجاعه واحد يعد طول عمره يدور على حد يشاركه خدمه ولا سفريه و المشكله انه ممكن ما يلقيهوش. ناس مش واثقه في قدراتها و ناس مش مقتنعه بنفسها و انها ممكن تكون فرق كبير. انت نفسك فكر كام مره اترجيت واحد صاحبك يجيي معاك و يشجعك في مشوار ؟؟

طب وبعدين : علشان نطير يبقي لازم نلغي القيود و علشان نلغيها لازم نكتشفها ... منطقي جدا خلاص الحكايه واضحه تعالوا نساعد بض نطير نبص لبعيد و نروح و نكتشف و نتعلم و نعمل حاجه ليها قيمه مش هنتكلم كتير بس هنقيم نفسنا و مجتمعنا و كل حاجه مش هنسيب....
و مفيش قيود و مافيش قانون طول ما انت متحدى نيوتن و تفاحته . هنقترح خطوات عمليه و نغير المجتمع الي انا و نت فيه بلفتات بسيطه .